韓國iCoop如何實現「共建共管共享」

歌仔都有得你唱，作為一間企業入面一塊小小嘅齒輪，#我哋呢班打工仔 對於上述嘅情景應該都見慣不怪，亦都已經習以為常。可能有人覺得作為一隻社畜，依啲嘢都係 #命裡有時終須有，正所謂「#鬼叫你窮呀頂硬上」吖嘛，上司叫到咪聽囉，小薯係冇say㗎啦，最多咪FF一下有朝一日自己升做管理層有份話事，再唔係發下夢自己做老闆咁咪可以想點就點囉，諗完好「出返去做嘢先啦」，記住星期一九點準時返工呀。

 

有邊個諗到呢一種咁唔現實嘅「痴心妄想」—人人都有機會做老闆有份決策，原來唔係淨係一個「夢」，喺依個世界真係有人可以實現到㗎。唔好「噓」住先，我哋唔係講緊果啲失驚無神發咗達果啲萬中無一嘅case喎，而係真真正正人人（包括我哋依啲「成舊飯」）都有機會參與決策、表達意見、有份話事：想幾點開始返工可以自己做決定、工作內容可以揀、唔會有人對你指指點點，甚至人工都可以按你嘅付出合理咁畀返你。

 

講咗咁耐，到底係咩人喺邊度可以有咁理想嘅工作？依啲咁筍嘅工係咪同戀愛一樣，總不可接觸嘅呢？

 

有啲嘢你以為 #在那遙遠的地方，其實佢只不過係喺同香港隔咗3個鐘頭飛機嘅韓國。

 

iCOOP係韓國一間以尊重個人同勞工、確保食物安全、保護農業同環境為目標、提倡良心消費、由生產者同消費者一齊管理嘅大型合作社聯盟。截至2021年，佢轄下擁有100個各大規模唔同業務嘅合作社，總共僱用咗超過4000個員工（或者叫社員），生產緊2000幾樣唔同類型嘅貨品（包含各種生活用品，糧油雜貨），擁有大概250間商店，總數有超過30萬位會員；講咗咁多數字，可能有人覺得「佢同一般企業咪一「kf6」樣，係包裝得好啲咋嘛」，然後已經想掟住雞蛋「撳交叉」唔睇落去，等一陣先，睇埋落去！iCOOP同一般公司比其實多咗幾粒神奇魔藥，先至令到佢可以令我哋發緊嘅夢成真㗎。

 

第一樣iCOOP神奇嘅嘢係佢哋嘅管理模式同一般企業好唔同，iCOOP作為一間合作社聯盟，成個組織唔同部門嘅運作都係圍繞住一系列嘅基本原則。按住依堆原則，每一個喺iCOOP旗下合作社都有好高嘅彈性同自由度，所有做嘢嘅人都有份參與到決策，舉個例，喺一間出產食物嘅生產合作社入面，唔單只唔會有「癲過雞」嘅波士，所有員工都有份打骰集體決定每個人做啲咩（一定唔洗俾啲無良老闆捽數）、賺咗啲錢點分（你冇睇錯！真係搵50k指日可待呀）、甚至決定依間合作社嘅返工時間（即係可以永遠唔洗OT，或者瞓到12點先返工都得呀！），只要meet到target交到數就得㗎啦。可能有人會問「度度都有自己規矩，唔會搞到亂曬大龍嘅咩？」唔好意思，又真係唔會喎，iCOOP會有一套溝通機制，每間細嘅合作社都有大概8個類似董事嘅人（由社員選出）去代表自己間合作社同其他部門開會協調工作，有需要甚至會開大會等人人都有得參加。簡單啲講，iCOOP依種模式可以令所有員工（社員）都有份共同建立依間公司，同時亦都可以參與到管理工作（唔係淨係舉手嗌「通過」果種呀），由打工仔變做N分1個老闆，由社畜變返做一個人

 

除咗管理模式，iCOOP同一般公司唔同嘅係，佢嘅資產係所有會員共同擁有嘅。即係咩意思呢？用個冇咁抽象嘅講法，一般公司比如你用緊嘅工作枱、電腦、甚至係你個人本身其實都係屬於公司嘅資產，亦都可以話係老闆同股東嘅財產，買啲乜嘢返嚟、你有冇得用、點樣分配俾員工都要睇老細面色，一個唔好彩整爛咗甚至要賠錢俾公司；而喺iCOOP，一切公司嘅財產都係所有員工共有共享嘅，啱啱講果堆嘢固然唔洗俾人批准先用得，買啲咩擺喺公司係一齊決定，除此以外，iCOOP有一點好特別嘅係，員工係有資格提出自己需要啲咩嘅，唔好限制自己嘅想像空間住，諗一下先。。。

 

「一、二、三，諗完！」開估，#答案係陳國邦，呀唔係，答案係「iCOOP可以為一個地區嘅員工起一間醫院、桑拿、戲院，甚至係請明星返嚟搞Concert！！！」喺韓國南部嘅求禮郡，因為地方人口少，冇大公司肯投資起一啲民生設施，而iCOOP按喺果度做嘢嘅職員需要，整咗好多例如「Natural Dream Cinema」同其他「多元文化中心」（集商店、餐飲、辦公、娛樂消閒設施於一身）之類嘅配套設施出嚟。「有人會問唔會有「自由騎士」嘅咩？」你當iCOOP傻嘅咩，當然係會員先用得㗎啦！

 

以上依堆嘢加埋令到iCOOP比起一般企業人性化好多，換轉係大企業，乞到一部咖啡機都已經係皇恩浩蕩啦！除咗依啲同一般企業唔同嘅嘢，最重要嘅係咩呀？就係用依種模式管理嘅公司，佢嘅盈利能力根本唔會差過一般公司呀，以2021年嘅數字，佢嘅營業額有成港幣40億咁多，我都數唔到即係幾多罐午餐肉，總之比起其他大公司一啲都唔失禮啦（比如DONKI 2020-2021年喺成個亞洲嘅營業額係35.4億），亦都證明咗咁樣嘅營運方式唔係淨係可以FF㗎。

 

iCOOP嘅故事話到俾我哋聽，理想係可以實現，FF都可以成真架，當然要搞到好似iCOOP咁唔係咁易（人哋都用咗廿幾三十年），老土啲講羅馬都唔係一日就起好啦，但係只要相信 #這裡會有希望，一步一步嚟，總有一日，香港嘅打工仔都有機會踏上通往自由之路㗎！