另類咖啡體驗 - Session 2
今次我哋去咗國際紅十字路會體驗發展中地區貧窮嘅處境，嶺大同學親身體驗以製作紙袋維生嘅生活，又參觀入面嘅公平貿易商店與產品。
面對不停上漲嘅生活開支，手停，口就停，呢種貧窮下嘅生活壓力係真實存在係發展中國家嘅人民當中。
九歲嘅伊人（唔係MIRROR 嗰個伊人）有個夢想，就係為賴比瑞亞嘅小朋友起一個操場。但係佢冇錢又冇資源，伊人記得媽咪講過，政府好有錢。於是佢send咗封email 問政府：「我想為我哋嘅小朋友起一個playground，但我冇地，你可以俾塊地我嗎？」
政府應承左，不過佢仲未有人力資源去處理建築工程。於是伊人又send email 俾賴比瑞亞嘅富商，但今次失敗左。不過伊人冇放棄，佢號召咗個眾籌，有錢出錢，有力出力，全校嘅師生都支持伊人起一個操場。
最終伊人實現咗佢一直以來嘅夢想，因為齊心，所以事成。歌仔都有得你唱：一枝竹仔會易折彎，幾枝竹一扎斷折難～呢個都話緊俾我哋聽Commons 或者公平貿易其實都係解決貧窮嘅其中一個出發點。
同位地球村嘅村民，我哋仲可以再反思下：
1）到底世界出現咗咩問題？
貧窮只係其中一個被低估嚴重程度嘅問題，仲有其他可以依靠人與人之間嘅合作可以緩解嘅問題嗎？
2）我哋可以做啲咩去改變現狀？
我哋又可以點利用自己嘅身份、社會角色去改變現狀？
你有冇乜啟發？留言話俾我哋知！
另類咖啡體驗 - Session 3
星期二我哋好開心邀請到公平點總監Anthony 同我哋分享關於公平貿易嘅知識！
你知唔知 Fair Trade 同 Fairtrade 有咩分別？可能就咁睇字面上冇乜唔同，但其實前者係指涉所有關於公平貿易運動嘅標準，包括公平貿易嘅不同實踐方式，如慈善貿易、團結貿易、或產品認證等。而 Fairtrade 係指 Fairtrade International FLO 認可嘅公平貿易標準同埋佢哋產品上嘅標籤🏷️ 快啲袋穩呢個小冷知識，咁以後就唔會搞錯 Fair Trade 同 Fairtrade啦！
除左關於公平貿易，Anthony都有 share 有關marketing 嘅技巧～ 以 4Ps 為例：賣啲咩product、點樣定價、係邊度賣、同埋點樣做宣傳推廣！呢樣對我哋之後營運cafe都好有幫助🌟
希望同學仔係workshop 都袋到啲嘢走，等我哋同心協力令公平貿易唔係一個口號，而係實踐🤘🏻
另類咖啡體驗 - Session 4
上星期五我哋跳出嶺南，去咗兩間分別位於深水埗同旺角嘅café做visit，學習係香港地點樣可以run一間不只是café的另類café～
第一站我哋嚟到黑窗里 @blackwindow___ ，我哋去到樓上好似秘密基地嘅空間聽兩位負責人分享佢哋自由定價同運作café 嘅做法。黑窗里其實就好似一個朋友圈，有朋友叻畫圖，咁佢哋就會請佢畫，擺係café入面展示。有朋友叻攝影，咁佢就會擔任攝影師，去幫手做拍攝嘅工作。黑窗里其實係more than 一間餐廳，用一個合作社嘅形式去connect 佢哋認為值得支持嘅人同事。負責人仲講笑咁話黑窗里係資本主義復康中心🤣，一班被資本主義折磨嘅朋友圍爐去互相交流、取暖。所以佢哋視食物為一個促進人與人之間交流嘅媒介，而唔係一件商品，咁都解釋咗點解會有自由定價嘅出現～如果想知多啲黑窗里背後嘅理念，可以睇返上一個post🤓
第二站我哋去到良亭雅敍 Pavilion Café @pavilioncafemongkok ，之前foodie系列就介紹過佢哋嘅嘢食，今次再同同學一齊visit都了解多咗佢哋係點樣運用呢個共享空間去吸引人流，同時成為一個風雨中的歇腳亭👐🏻。作為一間樓上café，係冇任何招牌嘅情況下，佢哋藉租用場地、免費自修室、室內busking、board game night、讀書會等活動去話俾人知有一個咁樣嘅地方，同時亦寄賣不同手作產品，及泰北小農的產品！透過佢哋嘅分享，同學仔都了解多咗實際run café 嘅運作同要留意嘅地方，遲啲落手落腳做嶺南café 店長嘅時候就唔會太騰雞啦😎
另類咖啡體驗 - Session 5
終於到咗萬眾期待落手沖咖啡嘅環節！ 上星期五，我哋去咗搵阿沈( Café Je T’aime、Café Je T’aime II、C’est La Vie 文化會館及添飲咖啡館創辦人) @cafe_je_taime @cafejetaime2 教同學仔沖咖啡☕️ 唔好睇小一杯容量唔多嘅咖啡，其實落手沖都要花好多心機同時間，要睇得又飲得就更加要努力鑽研，真係唔容易㗎！ 係沖任何咖啡之前，首先一定要識整咖啡粉餅。雖然係有壓粉器幫手，但都係要用身體嘅力量去壓先會夠實，所以開café 前都係要做下運動先💪🏻😮💨 之後就係打奶泡，做咖啡師除咗手定眼定，對耳都要打開，簡單啲講就係所有感官都要好sensitive。打奶泡個陣要專心留意有幾多下滋滋聲，當下就即刻有同學答中，果然同學仔係有做咖啡師嘅潛質🤩 打完奶泡當然唔少得落手沖杯俾自己試下，順便練習下點樣拉花～角度、方向、手定、奶打得夠唔夠綿密，都係拉到靚花好重要嘅因素。有同學拉嘅花仲得到阿沈嘅讚賞，Café 到時就靠曬你哋啦！ 如果大家都有興趣想試下由嶺南同學仔親手製作嘅咖啡，不妨留意住i-COMMON HK嘅IG，到時Café 開張歡迎過嚟支持下✨
另類咖啡體驗 - Session 6
上星期五我哋啱啱實習咗一次咖啡師學徒，琴日又趁熱打鐵，去國際十字路會Silk Road Cafe絲路咖啡廳繼續整咖啡啦～不過，除咗壓粉餅、打奶泡、調糖水呢啲技術，日常運作Cafe仲有好多嘢需要留心注意呀！ 作為咖啡師，最重要係聆聽同埋尊重客人需要，細緻到一杯飲品要唔要加糖、加糖加幾多，都要問下客人喜好，接待客人更加要耐心禮貌。同時要留意個人同環境嘅清潔，思鳳特別提醒我哋，on duty嘅時候手唔可以戴飾品，更要將指甲剪乾淨。另外，抹咖啡機同工作枱嘅毛巾都要分開，防止細菌傳播。 絲路咖啡廳位於國際十字路會(@crossroadsglobalvillage )入面，供應的飲品同小食原料都來自於公平貿易，令生產者得以賺取合理、應得的收入。即係話，你喺度享受咖啡的同時，都幫助緊生產者改善生活、脫離貧困。 如果大家都有興趣想試下由嶺南同學仔親手製作嘅咖啡，不妨留意住i-COMMON HK嘅IG，到時Café 開張歡迎過嚟支持下✨
另類咖啡體驗之做一日農夫
上星期四，我哋化身成見習農夫🧑🌾 ，嚟個落田初體驗～ @鄉騲習作嘅負責人Rebecca首先同我哋分享本地農業嘅情況，令我哋了解香港本地菜供應量會不停下跌嘅原因🥲 原來到咗2000年本地菜嘅自給率已經跌到得4%。萬一有日我哋冇供港菜，就好似疫情嘅時候，我哋又應該如何面對？ 跟住就正式到同學仔落手工作，不過都離不開草～ 一開始就試下用手提打草機打草，同學仔覺得幾治癒，又唔難操作，唔知到時搞個打草work camp有冇人想join呢(🤫 打完草我哋就嘗試拔草，睇落簡單，但其實係太陽下拔草，都咪話唔辛苦😵 不過人多好辦事，兩隊拔到嘅野草都不相伯仲！ 勞動過後，Rebecca同大家分享點樣用農場出產嘅冬瓜，煮成冬瓜糖，同學仔可以一起沖返杯透心涼嘅天然冬瓜tonic，消暑解渴，讚！！！ 雖然本地菜比進口菜貴啲，但係本地農夫用心種植嘅農產物，而我哋支持本地農產物，亦係尊重生產者嘅付出，呢啲係用錢都買唔到嘅～相信同事仔經過今次體驗都深受啓發💭
另類咖啡體驗 - Last Session
話咁快接近八星期嘅另類咖啡體驗workshop已經去到尾聲😢 去到最尾一堂，同學仔就根據已經分好咗嘅4組：maketing、activities、operation、exhibition，就住唔同組別嘅性質，去構思實際營運cafe 嘅做法。 同學仔都諗咗好多好有趣嘅cafe 名、活動內容、營銷手法等等，唔知大家想我哋係library 嘅café 叫咩名呢？歡迎係下面comment 大家一齊集思廣益，畢竟commons 就係講求民主參與，諗名諗活動當然唔少得大家同同學仔嘅參與啦👻 最後到咗present 環節～各組互相就住其他組別present 嘅內容提出問題，互相交流看法，討論嘅氛圍好好✨ 再以innovative、feasibility 同value 呢三項去評分👐🏻 如果同學想將自己嘅想法execute，對組織及營運有興趣嘅話，不妨加入成為我哋Cafe嘅committee！對沖咖啡、Cafe 店內日常工作有興趣嘅更加可以報名做Cafe 小店員🪪～ 📣Cafe 嘅menu 設計、裝飾都好需要人幫手！如果你對木藝木工都好有興趣，我哋嘅maker team等緊你嘅加入！欲知詳情🔎 可以DM或者send email去icommonhk@gmail.com 查詢～