時至今日，仍有某些國度會把月經視為不潔的象徵，認為經血會召來厄運、帶來災難。而在看似進步的香港，月經也不算是一個主流社會會討論的話題。早前更有網民指因被上司怒斥：「M痛？我夠有月經啦，又唔見我好似你咁痛？」而選擇辭職。同時，仍有民間組織默默耕耘，用月經杯和布M巾說話，打破性禁忌，以滴水穿石的堅毅推廣性/別教育。
Zoe是其中一員，她於2014年成立了售賣環保月事產品的「Happeriod 每悅事」，起初，Zoe只能在工餘時間搜羅不同牌子環保月事用物，後來聚集了一群顧客，漸漸成為一個成熟的社群。於是，Zoe便在2017年轉為全職員工，除了售賣月事用物外，還透過舉辦月經與身體工作坊、出版書籍、參與墟市等社區活動，以不同方式推廣月經教育，並支撐Happeriod經營下去。
Zoe憶述，初次接觸布M巾是在「Anti480反性暴力資源中心」參加工作坊。事後，Zoe便和朋友嘗試團購月經杯，她發現使用月經杯的切身經驗，會更容易令人打開對性/別、身體的討論：「我哋十幾個女仔一齊去團購月經杯，隔咗一排大家都嚟M，可以試用產品，大家係好願意喺facebook同公眾平台去分享經驗。例如有人試過用住個月經杯去照X-ray，或者分享返開始用月經杯時，大家各自點同家人、男友去講呢件事，就會涉及到好多對身體嘅討論。呢啲產品令大家好容易去講起呢個topic。令到我都變成咗興趣，帶多啲產品俾大家，開展呢個討論。」
Zoe在大學主修社會科學，接觸不少性別團體，她亦加入了新婦女協進會實習，認識了有關性暴力及相關性別平等政策的不足。Zoe希望把過往學到的知識帶進校園，「學校會擔心話題太有爭議性，但唔講唔代表無事發生，反而講多啲先可以認清自己對性別嘅睇法。反而知道自己身體界線，先知道幾時要say yes，幾時要say no。」Zoe發現，就性別議題，坊間的資源大多被分配到「補救措施」，但性教育的資源則很缺乏，「所以遇到布M巾、月經杯嘅時候，我就覺得原來（產品）可以做引子，帶出性別教育嘅面向，我就覺得好值得做。」
Zoe最常用的產品是月經杯，使用月經杯會令自己更留意經血的狀態。Zoe指，有時作息不定時，到下次月經來潮時，月經的顏色的確有所不同，是身體給自己的溫馨提示。
第一次經血來潮時，Zoe便體會到自身經驗和教科書的描述有所不同，「多數女仔第一次啲會係啡啡地色，其實唔係教科書上面嘅紅色，第一次真係會打咗個突。我中三嗰排成日經痛，我好記得有個外籍阿sir，佢見我伏咗喺枱，就過咗嚟問候下我，之後就寫咗隻藥名俾我，話係佢老婆經痛都有食，叫我睇下適唔適合。」現在，當Zoe進行性別教育時，會時常回想起當年這個小故事，「其實呢樣嘢應該平常到好似普通頭暈身㷫咁。」
性/別議題對公眾來說，仍未算得上是普及。Zoe笑說一次在維園擺市集的經歷，是次市集的攤檔比較多元化，受眾的光譜也比較闊。當天有人經過happeriod的攤檔時，指覺得被冒犯，當場拍攝他們的樣子及質問她們為何要在公眾場合談論月經，「問我哋係男定女，開始質疑我哋嘅性別。」；有些人則未曾見過月經杯、布M巾，帶著獵奇的心態去看她們的產品。
不同月事用品 為人生提供更多選擇
Zoe認為，無論選用哪種月事產品，最主要目的是為人生提供更多的選項，「無論月經杯又好，用棉條都好，都會涉及到陰道冠（處女膜）嘅討論，喺工作坊都會有人問到。但當你知道陰道冠（處女膜）本身其實已經有窿窿，係可有可無嘅，唔係用嚟判斷你有冇性經驗嘅指標，大家就會恍然大悟。當然你可以有唔同價值觀去遵守，例如婚前性行為你可以唔okay，但就唔好因為一啲錯誤嘅觀念而放棄使用一啲令你有更多生活選擇嘅產品。」Zoe提到，有一小六女學生是泳隊成員，開始月經來潮時因家人禁止使用棉條或月經杯，無法恆常練習，最後放棄了游泳。
性別教育工作長路漫漫，「Happeriod」默默地走了將近十年。最令Zoe鼓舞的是會有人向她分享使用布M巾及月經杯後的人生轉變，「比較深刻嘅朋友會分享，真係會諗多咗自己身體，之後再諗，有冇乜嘢可以再令自己開心啲，可以取悅自己多啲呢？雖然唔係咩搵大錢嘅工作，但係呢啲分享其實係揼石仔，嗰轉變唔係買完產品就立即會出現，靠大家的分享先繼續堅持到，唔係嘅話就會唔知自己做緊啲咩。」Zoe指，看到顧客在facebook group內會自發解答月經杯新手的問題， 顧客之間形成了一個活躍的社群，一點一滴地進步，便有動力堅持下去。
————————————————————————————————————
如何使用月經杯
https://happeriod.com/pages/how-to-use-menstrualcup
如何使用布衛生巾